اقتصادی جرائم ونگ کرائم برانچ کشمیر نے ایک اہم کارروائی کے دوران طویل عرصے سے مطلوب دھوکہ باز ملزم کو گرفتار کر لیا ہے، جو مبینہ طور پر جعلسازی، دھوکہ دہی اور جعلی سرکاری ملازمت کے دستاویزات کے استعمال سے متعلق 11 مختلف مقدمات میں ملوث ہے۔
ترجمان کی جانب سے جاری بیان کے مطابق گرفتار ملزم کی شناخت عبدالمجید میر ولد عبدالرحیم میر ساکنہ لاشتیال کلاروس، ضلع کپواڑہ کے طور پر ہوئی ہے۔ ملزم کے خلاف پرنسپل ڈسٹرکٹ اینڈ سیشن جج سرینگر کی عدالت سے طویل عرصے سے زیر التوا گرفتاری وارنٹ جاری تھا، جس پر عمل درآمد کرتے ہوئے ای او ڈبلیو نے اسے گرفتار کیا۔
بیان کے مطابق ملزم کے خلاف ایف آئی آر نمبر 17/2015 پولیس اسٹیشن کرائم برانچ کشمیر میں تعزیراتِ رنبیر کی دفعات 420 (دھوکہ دہی)، 467، 468، 471 (جعلسازی اور جعلی دستاویزات کا استعمال) اور 120-B (مجرمانہ سازش) کے تحت درج کی گئی تھی۔ تحقیقات مکمل ہونے کے بعد اس کے خلاف عدالت میں چارج شیٹ بھی پیش کی جا چکی ہے۔
ترجمان نے بتایا کہ عبدالمجید میر ایک عادی دھوکہ باز ہے اور اس کے خلاف 11 دیگر مقدمات بھی مختلف تھانوں اور تحقیقاتی اداروں میں درج ہیں، جن کا تعلق عوام کو جعلی سرکاری ملازمتوں کا جھانسہ دینے، جعلی تقرری نامے، فرضی ملازمتی دستاویزات اور جعلسازی سے ہے۔
بیان کے مطابق ان 11 مقدمات میں سے چار ابھی بھی زیرِ تفتیش ہیں، جبکہ سات مقدمات میں چارج شیٹس عدالتوں میں داخل کی جا چکی ہیں۔ای او ڈبلیو نے کہا کہ مصدقہ اطلاعات کی بنیاد پر کارروائی کرتے ہوئے ملزم کو گرفتار کیا گیا، بعد ازاں اسے متعلقہ عدالت میں پیش کیا گیا جہاں سے عدالت نے اسے جوڈیشل ریمانڈ پر بھیج دیا۔ بعد میں اسے سنٹرل جیل سری نگر منتقل کر دیا گیا۔
