ضلع رام بن کے چندرکوٹ علاقے میں سوموار کی صبح امرناتھ یاترا کے قافلے میں شامل متعدد گاڑیاں آپس میں ٹکرا گئیں، جس کے نتیجے میں 18 امرناتھ یاتری معمولی زخمی ہو گئے۔ تمام زخمیوں کو فوری طور پر ضلع اسپتال رام بن منتقل کیا گیا، جہاں ڈاکٹروں کے مطابق ان کی حالت خطرے سے باہر اور مستحکم ہے۔
ضلع ترقیاتی کمشنر رام بن نے بتایا کہ یہ حادثہ لنگر پوائنٹ، چندرکوٹ کے مقام پر ا±س وقت پیش آیا جب پہلگام روٹ کی جانب رواں یاتریوں کے قافلے میں شامل جموں و کشمیر روڈ ٹرانسپورٹ کارپوریشن (جے کے آر ٹی سی) کی دو بسیں آپس میں ٹکرا گئیں۔
انہوں نے بتایا کہ ایک بس سامنے چل رہی ایک کار سے جا ٹکرائی، جبکہ کار آگے موجود ایک نجی بس سے ٹکرا گئی، جس کے باعث چار گاڑیاں حادثے کی زد میں آ گئیں۔
حادثے کے فوراً بعد پولیس، سول انتظامیہ، طبی عملہ اور دیگر امدادی ٹیمیں موقع پر پہنچ گئیں۔ زخمی یاتریوں کو ابتدائی طبی امداد فراہم کرنے کے بعد ضلع اسپتال رام بن منتقل کیا گیا، جہاں ان کا علاج جاری ہے۔
ڈی سی رام بن کے مطابق تمام 18 زخمی یاتریوں کو معمولی نوعیت کی چوٹیں آئی ہیں اور ان کی حالت مکمل طور پر مستحکم ہے۔
