سالانہ امرناتھ یاترا کے سلسلے میں سوموار کی صبح سخت حفاظتی انتظامات کے درمیان 7,754 یاتریوں پر مشتمل بارہواں قافلہ جموں کے بھگوتی نگر یاتری نواس سے کشمیر میں واقع دونوں بیس کیمپوں، پہلگام اور بالتال کیلئے روانہ ہوا۔
حکام کے مطابق قافلہ 303 گاڑیوں پر مشتمل تھا، جن میں 5,383 مرد، 2,071 خواتین، 222 سادھو، 58 سادھویاں، 16 بچے اور 4 خواجہ سرا (ٹرانس جینڈر) یاتری شامل تھے۔
حکام نے بتایا کہ یاتریوں کو دو الگ الگ قافلوں میں روانہ کیا گیا۔ بالتال روٹ کیلئے 133 گاڑیوں پر مشتمل قافلہ، جس میں 2,896 یاتری سوار تھے، صبح 3:30 بجے روانہ ہوا، جبکہ پہلگام روٹ کیلئے 170 گاڑیوں پر مشتمل قافلہ، جس میں 4,858 یاتری شامل تھے، صبح 4:05 بجے اپنی منزل کی جانب روانہ ہوا۔
انتظامیہ کے مطابق یاترا کے آغاز سے لےکر اب تک 2 لاکھ 52 ہزار سے زائد یاتری مقدس امرناتھ گھپا میں قدرتی برفانی شیو لنگم کے درشن کر چکے ہیں۔
