شوپیاں اور پونچھ میں سیکورٹی فورسز کی کارروائیاں

سرینگر14 فروری/: شوپیاں اور پونچھ میں سیکورٹی فورسز نے عسکریت پسندوں کی کمین گاہوں کو تباہ کیا۔ خبر رساں ایجنسی یو پی آئی کے مطابق پولیس اور فوج نے مشترکہ طورپر پونچھ کے کنائن گاﺅں کو محاصرے میں لے کر جنگجو مخالف آپریشن شروع کیا۔ معلوم ہوا ہے کہ تلاشی کے دوران سیکورٹی فورسز نے جنگجوﺅں کی ایک کمین گاہ کا پتہ لگایا اور وہاں سے بڑی مقدار میں اسلحہ وگولہ بارود برآمد کرکے ضبط کیا۔ ایس ایس پی پونچھ رمیش اگروال نے اسکی تصدیق کرتے ہوئے بتایا کہ ایس او جی اور فوج نے مشترکہ طورپر پونچھ کے مضافاتی علاقے میں جنگجوﺅں کی کمین گاہ سے ایک اے کے 74رائفل ، میگزین، چینی پستول ، پستول میگزین اوردوسرا قابلِ اعتراض مواد برآمد کرکے ضبط کیا۔ ایس ایس پی کے مطابق اس سلسلے میں کیس درج کرکے مزید تحقیقات شروع کی گئی ہے۔ دریں اثنا سیکورٹی فورسز نے شوپیاں کے کیلر علاقے میں عسکریت پسندوں کی ایک کمین گاہ سے قابلِ اعتراض مواد برآمد کرکے ضبط کیا۔ ذرائع نے بتایا کہ تلاشی کے دوران کمین گاہ سے وردی ، کھانے پینے کی اشیاءکے ساتھ ساتھ کچھ مقدار میں گولہ بارود بھی برآمد ہوا ہے۔