وادی کشمیر میں گرمی کی تپش جاری ہے اور جمعہ کو ایک بار پھر گرم ترین دن درج ہوا ۔ محکمہ موسمیات کے مطابق جمعہ کو ایک بار پھر دن میں شدید گرمی ریکارڈ ہوئی اور دن کا درجہ حرارت 34.5ڈگری ریکارڈ کیا گیا ۔ محکمہ موسمیات نے بتایا کہ سرینگر میں دن کا درجہ حرارت 34.5ڈگری سیلشس ، جموں میں بھی 34,5ڈگری سیلشس درج کیا گیا ۔ وادی کشمیر میں گرمی کی شدت برقرار، کئی مقامات پر درجہ حرارت معمول سے 4 ڈگری تک زیادہ ریکارڈکیا گیا
۔ اعداد و شمار کے مطابق قاضی گنڈ میں زیادہ سے زیادہ درجہ حرارت 32.0 ڈگری سیلشس جو معمول سے 4.1 ڈگری زیادہ تھا، جبکہ سیاحتی مقام پہلگام میں درجہ حرارت 28.0 ڈگری سیلشس رہااسی طرح کپواڑہ میں زیادہ سے زیادہ درجہ حرارت 33.0 ڈگری سیلشس ریکارڈ کیا گیا، جو معمول سے 2.2 ڈگری زیادہ تھا، جبکہ کوکرناگ میں پارہ 31.0 ڈگری سیلشس تک پہنچ گیا۔
ادھر مرکز کے زیر انتظام خطہ لداخ کے صدر مقام لیہہ میں زیادہ سے زیادہ درجہ حرارت 23.4 ڈگری سیلشس ریکارڈ کیا گیا۔سرینگر میں موسمیاتی مرکز کے ڈائریکٹر ڈاکٹر مختیار احمد نے کہا کہ یاترا کے محور سمیت جموں و کشمیر بھر میں موسم 10جولائی تک گرم اور مرطوب رہنے کی توقع ہے۔انہوں نے کہا کہ 11اور 12جولائی سے تبدیلی کی توقع ہے، کچھ مقامات پر درمیانے سے بھاری بارش اور وادی کشمیر میں ہلکی سے درمیانی بارش کا امکان ہے۔
