جموں کی ایک مقامی عدالت نے قومی تحقیقاتی ایجنسی (این آئی اے) کو دو ملزمان کا پانچ روزہ ریمانڈ منظور کیا جنہیں اپریل میں پہلگام دہشت گردانہ حملے کے پیچھے پاکستانی دہشت گردوں کو پناہ دینے کے الزام میں گرفتار کیا گیا تھا۔
دو افرادپرویز احمد جوٹھر اور بشیر احمد جوٹھر کو این آئی اے نے اتوار کے روز اس حملے کی تحقیقات میں پہلی بڑی پیش رفت میں گرفتار کیا جس میں 22 اپریل کو 26 افراد، زیادہ تر سیاح، ہلاک اور 16 زخمی ہوئے تھے۔
این آئی اے کے مطابق، گرفتار ملزمان نے حملے میں ملوث تین مسلح دہشت گردوں کی شناخت ظاہر کی ہے، اور اس بات کی بھی تصدیق کی ہے کہ وہ ممنوعہ دہشت گرد تنظیم لشکر طیبہ (ایل ای ٹی) سے وابستہ پاکستانی شہری تھے۔
عدالت کے ایک اہلکار نے بتایا کہ دونوں ملزمان کو ایڈیشنل ڈسٹرکٹ اینڈ سیشن جج جموں رتیش کمار دوبے کی عدالت میں پیش کیا گیا اور انہیں 27 جون تک پانچ دن کے لیے این آئی اے کی تحویل میں بھیج دیا گیا۔
