رپورٹ: مجید شیری
شمالی ضلع بارہمولہ میں سوموار کی علی الصبح ریکٹر اسکیل پر 3.6 شدت کا ہلکا زلزلہ محسوس کیا گیا، جس سے علاقے کے مختلف حصوں میں لوگوں میں کچھ دیر کیلئے خوف و ہراس پھیل گیا۔ تاہم ابتدائی اطلاعات کے مطابق کسی بھی قسم کے جانی یا مالی نقصان کی اطلاع موصول نہیں ہوئی۔
نیشنل سینٹر فار سیسمولوجی کے مطابق زلزلہ رات 2 بجے آیا، جس کی گہرائی زمین کے اندر 10 کلومیٹر ریکارڈ کی گئی۔ ادارے کی جانب سے جاری کردہ معلومات کے مطابق زلزلے کا مرکز ضلع بارہمولہ کے علاقے میں تھا۔
زلزلے کے جھٹکے محسوس ہوتے ہی کئی مقامات پر لوگ احتیاطاً اپنے گھروں سے باہر نکل آئے۔ اگرچہ زلزلے کی شدت زیادہ نہیں تھی، تاہم رات کے وقت آنے والے جھٹکوں نے لوگوں کو تشویش میں مبتلا کر دیا۔
