منشیات اسمگلنگ کےخلاف مسلسل کریک ڈاون جاری رکھتے ہوئے اور جاری نشا مکت جموں و کشمیر ابھیان کے تحت منشیات کی تجارت سے حاصل ہونے والے اثاثوں کے خلاف سختی سے کام کرتے ہوئے سرینگر پولیس نے تقریباً 3.5 کروڑ روپے کی غیر منقولہ جائیدادوں کو ضبط کیا ہے جن کی مالیت تقریباً 3.5 کروڑ روپے کی منشیات سے متعلق ہے۔
ایک بیان میں پولیس نے کہا کہ پہلی کارروائی میں، پولیس اسٹیشن نگین نے ایف آئی آر نمبر30/2021انڈر سیکشن 8Sاین ڈی پی ایس ایکٹ کے سلسلے میں تقریباً 1.30 کروڑ روپے کی غیر منقولہ جائیداد کو ضبط کیا۔ بیان کے مطابق منسلک جائیداد میں ایک دو منزلہ رہائشی مکان اور حبک کراسنگ، حضرتبل میں واقع زمین شامل ہے، جس کا تعلق راحیل منظور ملہ ولد منظور احمد ملہ ساکنہ حبک کراسنگ، حضرتبل سے ہے۔
ایک الگ کارروائی میں، پولس تھانہ صورہ نے این ڈی پی ایس ایکٹ کی دفعہ 68-Fکے تحت تقریباً 2.20 کروڑ روپے مالیت کا ایک رہائشی مکان منسلک کیا جس کا تعلق عادل رشید گڈو ولد عبدالرشید گڈو ساکنہ کیل خان گلی (حیدر کالونی) اپر صورہ سے ہے، جو منشیات کی غیر قانونی اسمگلنگ میں ملوث ہے۔
تفتیش کے دوران، دونوں جائیدادوں کی نشاندہی غیر قانونی طور پر حاصل کردہ اثاثوں کے طور پر کی گئی جو منشیات کی سمگلنگ کی سرگرمیوں کے ذریعے حاصل ہونے والی آمدنی سے حاصل کی گئی تھیں۔
