رپورٹ : جیند شفیق
جموں کشمیر میں جاری نشہ مکت ابھیان کے تحت منشیات کے ناسور کے خلاف ایک بڑی کارروائی کرتے ہوئے سوپور پولیس نے این ڈی پی ایس ایکٹ 1985 کی دفعہ 68F کے تحت ایک مفرور اور بدنام زمانہ منشیات فروش کی 1.23 کروڑ روپے سے زائد مالیت کی دو غیر منقولہ جائیدادیں ضبط کر لی ہیں۔
ضبط کی گئی جائیدادوں میں شامل ہیں ایک دو منزلہ رہائشی مکان بمعہ چہار دیواری۔سروے نمبر 365 من کے تحت 1 کنال 10 مرلہ اراضی۔ ان دونوں جائیدادوں کی مجموعی مالیت 1.23 کروڑ روپے سے زائد ہے۔ یہ جائیدادیں محمد اشرف میر عرف آشو ولد مرحوم فاروق احمد میر ساکنہ جامعہ قدیم سوپور، حالیہ رہائشی کرنک شیون کالونی، نگین باغ-بی، سوپور کی ملکیت ہیں۔
یہ کارروائی پولیس اسٹیشن سوپور میں درج ایف آئی آر نمبر 23/2026کے سلسلے میں عمل میں لائی گئی۔ تفصیلی مالیاتی تحقیقات سے یہ انکشاف ہوا کہ مذکورہ جائیدادیں منشیات کی غیر قانونی اسمگلنگ سے حاصل ہونے والی آمدنی کے ذریعے خریدی گئی تھیں۔ این ڈی پی ایس ایکٹ کی متعلقہ دفعات کے مطابق ضبطی کی کارروائی آزاد گواہوں کی موجودگی میں مکمل کی گئی۔
مذکورہ مقدمے میں ملزم مفرور ہے اور اس کے خلاف پہلے ہی ہُو اینڈ کرائی نوٹس اور لُک آ¶ٹ نوٹس جاری کیا جا چکا ہے۔ ملزم متعدد دیگر این ڈی پی ایس مقدمات میں بھی ملوث ہے، جو منشیات کی اسمگلنگ میں اس کی مسلسل سرگرمیوں کی نشاندہی کرتا ہے۔
