قریب ایک ہفتہ تک خراب موسمی صورتحال کے بعد موسم خوشگوار ہونے کے ساتھ ہی دن بھر اچھی خاصی دھوپ نکلنے آنے سے دن اور رات کے درجہ حرارت میں اضافہ ہو گیا ہے ۔ اتوار کو دن بھر کھلی دھوپ کے باعث درجہ حرارت میں کافی اضافہ دیکھنے کو ملا جبکہ موسم بہتر ہونے کے ساتھ ہی رات کے درجہ حرارت میں بھی اضافہ درج ہو گیا ۔ ادھر محکمہ موسمیات نے آئندہ کئی دنوں تک خشک موسم کی پیشگوئی کی ہے ۔
محکمہ موسمیات کی جانب سے جاری کردہ تازہ ترین پیشینگوئی کے مطابق جموں و کشمیر میں موسم 15 اپریل تک بڑے پیمانے پر خشک رہنے کی توقع ہے، 16 اور 17 اپریل کو بارش اور گرج چمک کے ساتھ ہلکی بارش کا امکان ہے۔محکمہ موسمیات نے کہا کہ خشک موسم رہنے کے نتیجے میں دن کے درجہ حرار ت میں اضافہ متوقع ہے ۔ پیشن گوئی کے مطابق جموں کشمیر کے زیادہ تر علاقوں میں 13 اپریل سے 15 اپریل تک بنیادی طور پر خشک موسم کا سامنا کرنا پڑے گا۔ اس مدت میں کاشتکاری کے جاری کاموں میں مدد کی توقع ہے، جس میں کوئی بڑی رکاوٹ متوقع نہیں ہے۔انہوں نے مزید کہا کہ 16 اپریل سے موسم میں تبدیلی متوقع ہے جب بارش اور گرج چمک کے ساتھ کئی مقامات پر اثر پڑ سکتا ہے۔
انہوں نے کہا کہ ان دنوں بعددوپہر موسمی صورتحال میں تبدیلی کے امکانات کو رد نہیں کیا جا سکتا ہے انہوںنے مزید کہا کہ اس مختصر وقت کے بعد، 18 اپریل سے 22 اپریل تک موسم دوبارہ خشک ہونے کی توقع ہے، جس سے پورے خطے میں مستحکم حالات بحال ہوں گے۔انہوں نے کہا کہ پیشنگوئی زرعی برادری کیلئے اہمیت رکھتی ہے، کیونکہ جاری خشک موسم کسانوں کو بوائی اور باغات کے انتظام سمیت فیلڈ ورک کے ساتھ آگے بڑھنے کی اجازت دیتا ہے۔ حکام نے کاشتکاروں کو مشورہ دیا ہے کہ وہ متوقع بارش کے مختصر عرصے کے دوران محتاط رہتے ہوئے اپنا کام جاری رکھیں۔
