پہلگام کے عوام کیساتھ ناانصا ف
سرینگر/27دسمبر: کوہ پیمائی اور واٹر سپورٹس کے انسٹی چوٹ (JIM&WS) کو پہلگام سے منتقل کرنے کے فیصلے کو فوری طور پر کالعدم قرار دینے کا مطالبہ کرتے ہوئے نیشنل کانفرنس نے انسٹی چوٹ کی سربراہ مرکزی وزیر دفاع شریمتی سیتارمن اور ریاستی گورنر شری ستیہ پال ملک پر زور دیا ہے کہ ادارے کہیں اور لے جانے کے کسی بھی اقدام پر فوری طور پر روک لگا دی جائے۔سی این آئی کو موصولہ بیان کے مطابق پارٹی کے ضلع صدر اسلام آباد و سابق ایم ایل اے پہلگام الطاف احمد کلو نے اپنے ایک بیان میں کہا کہ جواہر انسٹی چوٹ آف مائونٹی نیرنگ اینڈ واٹر سپورٹس کی منتقلی کا فیصلہ سمجھ سے بالاتر ہے۔ یہ ادارہ گذشتہ 35 سال سے پہلگام میں قائم ہے اور اس ادارے سے مقامی لوگوں کا روزگار بھی منسلک ہے۔ انہوں نے کہا کہ یہ ادارہ کئی دہائیوں سے مہم جوئی اور واٹر سپورٹس کا شوق رکھنے والوں کو تربیت اور نوجوانوں کو اپنی طرف راغب کرتا آیا ہے۔الطاف احمد کلو نے کہا کہ اس ادارے کی منتقلی کا فیصلہ پہلگام اور پہلگام کے عوام کیساتھ بڑی ناانصافی ہوگی۔ انہوں نے مرکزی سرکار دفاع سیتا رمن سے اپیل کی کہ وہ اس ادارے کی منتقلی کے فیصلے پر فوری طور پر روک لگائیں۔
