سرینگر، 30 اکتوبر
لیفٹیننٹ گورنر منوج سنہا کا کہنا ہے کہ جموں وکشمیر کو بد عنوانی کے وبا سے صاف وپاک کرنا ہمارا مشن اور ویژن ہے۔انہوں نے کہا کہ ہمیں بد عنوانی سے نمٹنے کے لئے ایک مربوط اور اجتماعی نقطہ نظر کی ضرورت ہے۔
موصوف لیفٹیننٹ گورنر نے ان باتوں کا اظہار پیر کو ‘ایکس’ پر اپنے ایک پوسٹ میں کیا۔انہوں نے کہا: ‘ویجیلنس بیداری کے ہفتے کے موقع پر پیر کو سیول سکریٹریٹ میں راج بھون کے افسران و عملے اور انتظامی سکریٹریوں نے دیانتداری کا حلف اٹھایا’۔ان کا پوسٹ میں کہنا تھا: ‘ہمیں بد عنوانی سے نمٹنے کے لئے ایک مربوط اور اجتماعی نقطہ نظر کی ضرورت ہے جو ترقی میں رکاوٹ اور معاشرے کے اخلاقی پہلو کو کمزور کرتی ہے’۔
سنہا نے کہا کہ بد عنوانی کے کینسر کی بیخ کنی کے لئے تمام متعلقین کو ایک اہم رول ادا کرنا ہے۔انہوں نے کہا: ‘بد عنوانی سے صاف وپاک جموں وکشمیر ہمارا مشن اور وڑن ہے ہمیں اس موقع کو استعمال کرکے عوامی زندگی کے بہتر مستقبل، جوابدہی اور قابلیت کے فروغ کے لئے اپنے عزم کی تجدید کرنی چاہئے’۔یو این آئی
