یا ہماری گاڑیوں میں آگ لگادو یا پھر ہمیں گاڑیاں چلانے کی اجازت دی جائے

سرینگر/27جون؛ ٹرانسپورٹروں نے کمرشل گاڑیوں کو چلنے کی اجازت نہ دینے کے خلاف آج شہر سرینگر کے ٹی آری سی میں احتجاج کرنے کی کوشش کی جس کو انتظامیہ کی جانب سے ناکام بنایا گیا ہے جبکہ ٹرانسپورٹروںنے کہا ہے کہ انہیں خدا کے نام پر چھوڑ کر ان کے بال بچوں کو فاقہ کشی پر مجبور کردیا گیا ہے ۔ انہوں نے کہا کہ یا تو ہمیں تجارتی سرگرمیاں بحال کرنے کی اجازت دی جائے یا پھر ہماری گاڑیوں میں آگ لگادی جائے ۔ کرنٹ نیو زآف انڈیا کے مطابق کوروناوائرس کی وجہ سے جاری لاک ڈاون میں اگرچہ کافی حد تک نرمی کی گئی ہے اور تجارتی سرگرمیاں بھی کئی شرائط کے ساتھ بحال کی گئی ہیں تاہم کمرشل ٹرانسپورٹ ہنوز بند ہے جس کے نتیجے میں ٹرانسپورٹ سے وابستہ افراد اور ان کے اہلخانہ فاقہ کشی پر مجبور ہوچکے ہیں ۔ ٹرانسپورٹروں نے آج کمرشل گاڑیوں کو چلنے کی اجازت دینے کے مطالبے کو لیکر ٹی آری سی سرینگر میں احتجاج کرنے کی کوشش کی جس کو ضلع انتظامیہ کی جانب سے ناکام بنایا گیا ہے ۔ اس دوران ٹرانسپورٹ ایسوسی ایشن ، سرینگر ، جموں ، لداخ ٹیکسی سروس اونرس اینڈ ڈرائیورس یونین ٹی آر سی کی جانب سے احتجاجی مارچ نکالنے کی کوشش کی گئی جس کی قیادت وسیم اشرف بٹ کررہے تھے تاہم سرکار کی جانب سے اس کی اجازت نہیں دی گئی ۔ اس ضمن میں وسیم نے بتایا کہ ٹرانسپورٹروں کی پیٹ پر لات مار دی گئی ہے اور ہم لوگ کافی مشکل دو ر سے گزررہے ہیں کیوں کہ گزشتہ برس اگست سے ہماری گاڑیاں دھول چاٹ رہی ہیں انہوںنے کہا کہ کووڈ 19کے نتیجے میں اگرچہ تمام سرگرمیاں معطل تھیں تاہم اب دھیرے دھیرے سب کچھ نارمل ہوتا دکھائی دے رہا ہے لیکن اس کے باوجود بھی وادی کشمیر میں ٹرانسپورٹ کی سرگرمیاں بحال کرنے کی اجازت نہیں دی جاتی ہے جس کے باعث ٹرانسپورٹر سخت پریشانی میں مبتلاء ہوچکے ہیں ۔ انہوں نے کہا کہ گاڑیوں کو بینکوں کاقرضہ سے اور گاڑیاں بند رہنے کے نتیجے میں بینکوں کی قسط بھی ادا نہیں کی جاسکتی ہے ۔انہوںنے آبدیدہ آنکھوں سے کہا کہ سرکار کو چاہئے کہ یا تو ہمیں گاڑیاں چلانے کی اجازت دیں یا پھر ہماری گاڑیوں کو آگ لگادیں ۔ اس دوران ایک اور ڈرائیور نے کہا کہ یہ بات قابل افسوس ہے کہ ٹی آر سی گاڑیوں کو چلنے کی اجازت دی گئی ہے تاہم نجی ٹرانسپورٹ ہنوز بند ہے جو سراسر ناانصافی ہے ۔ احتجاج پر اُترے ٹرانسپورٹروںنے کہا کہ جوبھی کووڈ 19کے گائڈ لائن ہوگی ہم اس پر بھر پور عمل کریں گے اور اگر کوئی ہدایات پر عمل نہیں کرے گا اس کے خلاف سرکار کارروائی کرنے کی مجاز ہوگی لیکن ہمیں بھی اب آزادی کے ساتھ اپنی معمول کی سرگرمیاں بحال کرنے کی اجازت دی جائے ۔