رام بن : سرینگر ،جموں شاہراہ پر ہفتہ کی صبح اُس وقت المناک سڑک حادثہ رونما جب رامبن کے مقام پر ایک مسافر منی بس گہری کھائی میں جاگری جسکے نتیجے میں اب تک اس میں سوار 20 مسافروں کی موت ہوگئی اور کئی دیگر زخمی ہوئے .
معلوم ہوا ہے کہ منی بس زیر نمبر رجسٹریشن نمبر JK19-1593 رام بن سے بانہال کی طرف جارہی تھی ،جس دوران کالاموڑ کے مقام پر ڈرائیور گاڑی پر اپنا توازن کھو بیٹھا ،جسکی وجہ سے وہ 500 فٹ گہری کھائی میں جاگری .عینی شاہدین نے بتایا کہ کھائی میں گاڑی گرنے سے قبل چٹانوں کے ساتھ جا ٹکرائی جسکے نتیجے میں اسکے پرکچھے اڑگئے اور اس میں سوار مسافر ادھر ادھر گر گئے .
حادثہ کی اطلاع ملتے ہی پولیس ،ڈیزاسٹر منجیمنٹ اور مقامی لوگوں کی ایک خاصی تعداد جائے حادثہ پر پہنچ گئی ،جنہوں نے مشترکہ طور پر ریسکیو آپریشن شروع کردیا .
ریسکیو ٹیموں نے رسی کی مدد ایک ایک کرکے حادثے کے شکار افراد کو گہری کھائی سے نکالنے کا عمل شروع کیا گیا .
بتایا جاتا ہے کہ جس وقت یہ حادثہ پیش آیا ،گاڑی مسافروں سے کچھا کھچ بھری پڑی ہوئی تھی .معلوم ہوا ہے کہ اس حادثے میں 20 افراد کی موقعے پر موت ہوگئی جنکی نعشیں برآمد کی گئیں جبکہ 16 دیگر شدید زخمیوں کو اسپتال منتقل کیا گیا .
ضلع ترقیاتی کمشنر رامبن شوکت اعجاز نے شدید زخمیوں کو جموں میڈیکل کالج واسپتال پہنچانے کےلئے فوجی ہیلی کاپٹر کی مدد حاصل کی.تاہم خدشہ ظاہر کیا جارہا ہے کہ اموات میں اضافہ ہوسکتا ہے کیونکہ کئی افراد شدید زخمی ہوئے ہیں .
