خطے میں قیام امن کے لیے کشمیریوں کی امنگوں کے تحت مسئلہ کشمیرکا حل ضروری

بھارتی فورسزکی خلاف ورزی پربھرپورجواب دیا جائے/پاکستانی آرمی چیف
سرینگر /10نومبر /سی این آئی پاکستانی آرمی چیف جنرل قمرجاوید باجوہ نے فوج کوہدایت کی ہے کہ لائن آف کنٹرول پربھارتی فورسز کی جانب سے جنگ بندی کی خلاف ورزی کا بھرپورجواب دیا جائے۔سی این آئی مانیٹرنگ کے مطابق پاکستانی فوج کے شعبہ تعلقات عامہ (آئی ایس پی آر) کے مطابق پاکستانی آرمی چیف جنرل قمر باجوہ نے پاک فوج کی 10 کورکے ہیڈ کوارٹرکا دورہ کیا، جنرل قمرباجوہ نے ایل اوسی پراگلے مورچوں کا بھی دورہ کیا اوروہاں تعینات جوانوں کے ساتھ دن گزارا۔دورے کے دوران آرمی چیف کوکنٹرول لائن پرسکیورٹی صورتحال پرتفصیلی بریفنگ دی گئی اورآرمی چیف کو بھارتی فوج کی جانب سے فائرنگ اورجوابی کارروائی سے آگاہ کیا گیا، اس موقع پرآرمی چیف نے فوجیوں کو بہترین تیاری اورمناسب جواب پرسراہا۔دورے کے دوران آرمی چیف جنرل قمرجاوید باجوہ نے کہا کہ خطے میں قیام امن کے لیے مسئلہ کشمیرکا حل نہایت ضروری ہے، لائن آف کنٹرول پربھارتی بلااشتعال فائرنگ کا مقصد دنیا کی توجہ کشمیرسے ہٹانا ہے، مسئلہ کشمیراقوام متحدہ کی قراردادوں اورکشمیریوں کی خواہشات کے مطابق حل ہوگا۔ آرمی چیف جنرل قمرجاوید باجوہ نے جوانوں کوہردم تیاررہنے کی ہدایت کرتے ہوئے کہا کہ بھارت کی جانب سے جنگ بندی معاہدے کی خلاف ورزی کا بھرپور جواب دیا جائے۔