گورنر انتظامیہ فرقہ پرست اور شرپسند عناصر کی لگام کسنے کیلئے فوری اقدامات اُٹھائے/نیشنل کانفرنس

سرینگر/23جولائی: رام بن میں شرپسند اور فرقہ پرست عناصر کی طرف سے گورکھشا کے نام پر 65سالہ شہری پر قاتلانہ حملے کی شدید الفاظ میں مذمت کرتے ہوئے نیشنل کانفرنس نے ملوثین کو فوری طور پر پبلک سیفٹی ایکٹ کے تحت گرفتار کرنے کا مطالبہ کیا ہے۔ سی این آئی کو موصولہ بیان کے مطابق پارٹی کے معاون جنرل سکریٹری ڈاکٹر شیخ مصطفےٰ کمال اور پارٹی لیڈر و ضلع صدر رام بن سجاد شاہین نے ایک مشترکہ بیان میں گورنر انتظامیہ پر زور دیا ہے کہ گؤ رکھشا کے نام پر ریاست کی مذہبی ہم آہنگی اور آپسی رواداری کو ٹھیس پہنچانے والے عناصر کی فوری طور پر لگام کسی جائے۔ انہوں نے کہا کہ گذشتہ روز رام میں 65سالہ شہری عبدالمجید شیخ کیساتھ جو واقعہ پیش آیا وہ انتہائی تشویشناک ہے۔ دونوں لیڈران نے کہا کہ سابق پی ڈی پی بھاجپا حکومت نے ان عناصر کی پشت پناہی کی جس کی بدولت آج ہمیں یہ دن دیکھنے پڑ رہا ہے۔ انہوں نے کہا کہ اگر سابق حکومت نے ایسے عناصر کیخلاف فوری کارروائی کی ہوتی آج ایسے واقعات پھر سے رونما نہیں ہوتے۔ لیڈران نے کہا کہ ہندوستان بھر میں ایسے واقعات رونما ہورہے ہیں اور وزیرا عظم و سپریم کورٹ کی طرف سے صاف احکامات کے باوجود بھی زمینی سطح پر ان عناصر کیخلاف کارروائی نہیں ہورہی ہے۔ دونوں لیڈران نے ریاستی گورنر شری این این ووہرا سے اپیل کی کہ وہ ذاتی طور پر ایسے عناصر کی لگام کسنے کیلئے اقدامات اٹھائے۔ تاکہ مستقبل میں ایسے واقعات پیش نہ آئیں۔انہوں نے کہا کہ یہ فرقہ پرست عناصر امن و امان کی فضا اور آپسی بھائی چارہ کو پارہ پارہ کرنے کی مذموم کوشش کررہے ہیں۔ انہوں نے لوگوں سے بھی اپیل کی کہ ان شرپسند عناصر کے مقاصد کو کامیاب نہ ہونے دیں اور ہر حال میں آپسی بھائی چارہ اور ہم آہنگی قائم و دائم بنائے رکھیں۔/سی این آئی